ପୁଲିସ ଓ ପ୍ରଶାସନର ଛତ୍ରଛାୟାରେ ନୟାଗଡ଼ରେ ଦିନକୁ ଦିନ ବଢିଚାଲିଛି ବାଲି ମାଫିଆଙ୍କ ଦୌରାତ୍ମ୍ୟ | ସରକାରୀ ଗୃହ ନିର୍ମାଣଠାରୁ ଆରମ୍ଭକରି ଗ୍ରାମାଞ୍ଚଳରେ ଆବାସ ଗୃହ ନିର୍ମାଣ କାର୍ଯ୍ୟରେ ମହାନଦୀ ବାଲିର ଅଧିକ ଚାହିଦା ଥିବାରୁ ଏବଂ ନିର୍ମାଣକାର୍ଯ୍ୟ ପାଇଁ ଜିଲ୍ଲାକୁ ପ୍ରତି ଦିନ ଶହ ଶହ ଟ୍ରିପ ବାଲି ଆସୁଥିବାରୁ ବାଲି ମାଫିଆଙ୍କ ଚେର ଗାଁ ଠୁ ସହର ପର୍ଯ୍ୟନ୍ତ ଲମ୍ବିଛି | ମାଫିଆଙ୍କ ଦୌରାତ୍ମ ଏମିତି ବଢ଼ି ଯାଇଛି ଯେ ସେମାନେ ଆଇନ କାନୁନକୁ ନ ଡରି ବ୍ରିଜ ଓ ରାସ୍ତା ଉପରେ ଟ୍ରିପ ଟ୍ରିପ ବାଲି ରଖି ବେପାର କରୁଛନ୍ତି | ଏଭଳି ଦୃଶ୍ୟ ଦେଖିବାକୁ ମିଳିଛି ନୂଆଗାଁ ତହସିଲ ଅନ୍ତର୍ଗତ ତୁଳସୀପୁର ମାଳିସାହି କଲେଜ ପୂର୍ତ୍ତ ବିଭାଗ ରାସ୍ତାର ଖଣ୍ଡୁଗାଁ ଡାହୁକା ନଦୀ ଉପରେ ପ୍ରବାହିତ ବିଜୁ ସେତୁ ଉପରେ | ସରକାର ସେତୁଟିକୁ ଜଣ ସାଧାରଣଙ୍କ ଗମନାଗମନ ପାଇଁ ନିର୍ମାଣ କରିଥିବେ ବେଳେ ଏହାକୁ କବ୍ଜା କରିଛନ୍ତି ବାଲି ମାଫିଆ |
ଏହି ସେତୁ ଉପରେ ଦୈନିକ ଶହ ଶହ ଯାନବାହାନ ଚାଲୁଥିବାବେଳେ, ହଜାର ହଜାର ଲୋକ ଯାତାୟାତ କରନ୍ତି | ସରକାରଙ୍କୁ ରାଜସ୍ବ ଫାଙ୍କି ବ୍ରିଜ ଉପରେ ବେଆଇନ ଭାବରେ ବାଲି ଜମା କରି ବାଲି ମାଫିଆ ମାଲେ ମାଲ ହେଉଥିବା ବେଳେ, ରାତି ହେଲେ ଛୋଟ-ବଡ ଦୁର୍ଘଟଣାର ଶିକାର ହେଉଛନ୍ତି ପଥଚାରୀ | ଅନ୍ୟପଟେ, ବାଲି ମାଫିଆଙ୍କ ଗୁଣ୍ଡାଗିରି ପ୍ରତି ଆଖି ବୁଜିଦେଇ ସେମାନଙ୍କୁ ନିରବ ସମର୍ଥନ ଜଣାଉଛନ୍ତି ପୁଲିସ ଓ ପ୍ରଶାସନ | ନିଜ ପରିଚୟ ଗୋପନ ରଖିବାକୁ ଅନୁରୋଧ କରି, ପୁଲିସ-ପ୍ରଶାସନ ଓ ବାଲି ମାଫିଆଙ୍କ ମଧୁଚନ୍ଦ୍ରିକା ବିଷୟରେ ଜଣେ ସ୍ଥାନୀୟ ଟ୍ରାକ୍ଟର ମାଲିକ କହିଛନ୍ତି ଯେ ସେମାନଙ୍କୁ ବାଲି ଉତ୍ତୋଳନ କରିବା ପାଇଁ ପାଇଁ ମାସିକ ୧୦ ରୁ ୧୨ ହଜାର ଟଙ୍କା ‘ଚାନ୍ଦା’ ଦେବାକୁ ପଡ଼େ; ଯେଉଁ ମାସରେ ଖିଲାପ ହୁଏ ତହସିଲ କର୍ତ୍ତୃପକ୍ଷ ଧରପଗଡ଼ କରନ୍ତି | ତେବେ ଦେଖିବାକୁ ଗଲେ କିଛି ମାସ ହେବ ନୂଆଗାଁ ତହସିଲ ପକ୍ଷରୁ କୌଣସି ଧରପଗଡ଼ ନଥିବା କାରଣରୁ ମାଫିଆ ମାନେ ବାଲି ବିକ୍ରି ପାଇଁ ଏବେ ରାସ୍ତା ଉପରକୁ ଉଠି ଆସିଛନ୍ତି | ଯାହା ନୂଆଗାଁ ତହସିଲ କର୍ତ୍ତୃପକ୍ଷଙ୍କ ଅସଲ ଚେହେରାକୁ ଏବେ ପଦାରେ ପକାଇଛି | ତେବେ ଏଠି ପ୍ରଶ୍ନ ଉଠୁଛି ସବୁ ଜାଣି ସମସ୍ତେ ନୀରବ କାହିଁକି ? ପୁଲିସ ଓ ନୂଆଗାଁ ତହସିଲ କର୍ତ୍ତୃପକ୍ଷ ଏଭଳି ବେଫିକର ଲୁଟକୁ ପ୍ରଶୟ ଦେଇ ରାଜସ୍ବ ହାନି କରିବା ବୁଦ୍ଧିଜୀବୀଙ୍କୁ ଚିନ୍ତିତ କରୁଛି | ତେବେ ଏହି ବେଧଡ଼କ ବାଲି ଚୋରା ଚାଲାଣ ରୋକାଯିବା ନିହାତି ଆବଶ୍ୟକ ବୋଲି ସାଧାରଣରେ ମତ ପ୍ରକାଶ ପାଉଛି | ଏଠାରେ ଉଲ୍ଲେଖଯୋଗ୍ୟ କି , ଏ ବିଷୟରେ ନୂଆଗାଁ ତହସିଲଦାର ହେମନ୍ତ କୁମାର ନାୟକଙ୍କ ସହିତ ବହୁଥର ଯୋଗାଯୋଗ ପାଇଁ ଚେଷ୍ଟା କରି ନିରାଶ ହୋଇଛୁ ।