ବାଲେଶ୍ୱର: ବାଲିଆପାଳ ଥାନା ଅନ୍ତର୍ଗତ ନାରାୟଣପୁର ଗ୍ରାମରେ ଘଟିଥିବା ଦାହ ଘଟଣାକୁ ନେଇ ଅଞ୍ଚଳରେ ଚଞ୍ଚଳତା ସୃଷ୍ଟି ହୋଇଛି। ପରିବାରିକ ବିବାଦକୁ କେନ୍ଦ୍ର କରି ଜଣେ ବ୍ୟକ୍ତି ତାଙ୍କ ସ୍ତ୍ରୀଙ୍କୁ ଗୁରୁତର ଭାବେ ଆହତ କରିଥିବା ଅଭିଯୋଗ ହୋଇଛି। ସ୍ତ୍ରୀଙ୍କୁ ବଞ୍ଚାଇବାକୁ ଯାଇ ଶ୍ୱଶୁର, ଶାଶୁ ଓ ଶଳା ମଧ୍ୟ ଆହତ ହୋଇଛନ୍ତି। ସୂଚନା ଅନୁଯାୟୀ, ନାରାୟଣପୁର ଗ୍ରାମର ରାଜେନ୍ଦ୍ର ସାମନ୍ତରାୟଙ୍କ ଝିଅଙ୍କ ବିବାହ ୭ ବର୍ଷ ପୂର୍ବେ ସୋର ଅଞ୍ଚଳର ମାଳତ୍ରୀ ଗ୍ରାମର କରୁଣାକର କବିଙ୍କ ସହ ହୋଇଥିଲା। ଦୁହେଁଙ୍କର ଦୁଇ ଯୋଡ଼ା ସନ୍ତାନ ମଧ୍ୟ ଅଛି । କିଛି ଦିନ ଧରି ପରିବାରିକ ଅସନ୍ତୋଷ ଚାଲିଥିବା ବେଳେ ସ୍ତ୍ରୀ ନିଜ ବାପଘରେ ରହୁଥିଲେ।
ଗତରାତିରେ ଅଭିଯୁକ୍ତ ଶ୍ୱଶୁର ଘରକୁ ଆସି ବାଦବିବାଦ କରିଥିବା ଏବଂ ପରିସ୍ଥିତି ଉତ୍ତେଜିତ ହେବାରୁ ଆଗ୍ନେୟ ପଦାର୍ଥ ବ୍ୟବହାର କରି ଆକ୍ରମଣ କରିଥିବା ଅଭିଯୋଗ ରହିଛି। ଘଟଣାରେ ଚାରିଜଣ ଗୁରୁତର ଭାବେ ଆହତ ହୋଇଥିବା ସୂଚନା ମିଳିଛି। ଚିତ୍କାର ଶୁଣି ସ୍ଥାନୀୟ ଲୋକେ ଅଭିଯୁକ୍ତଙ୍କୁ କାବୁ କରି ପୋଲିସଙ୍କୁ ହସ୍ତାନ୍ତର କରିଥିଲେ। ଆହତମାନଙ୍କୁ ପ୍ରଥମେ ପ୍ରତାପପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା, ପରେ ଅବସ୍ଥା ଗୁରୁତର ହେବାରୁ ବାଲେଶ୍ବର ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି। ପୋଲିସ ମାମଲା ରୁଜୁ କରି ତଦନ୍ତ ଆରମ୍ଭ କରିଛି।
