ସରକାର ବିଦ୍ୟାଳୟ ଶିକ୍ଷାର ବିକାଶ ପାଇଁ ବିଦ୍ୟାଳୟଗୁଡିକୁ ୫ଟି ମାଧ୍ୟମରେ ରୂପାନ୍ତରିତ କରିଛନ୍ତି । ଏଥିପାଇଁ ରାଜ୍ୟ ରାଜକୋଷରୁ କୋଟି କୋଟି ଟଙ୍କା ଖର୍ଚ୍ଚ ହୋଇଛି । ହେଲେ ଏହି ରୂପାନ୍ତରିତ କାର୍ଯ୍ୟ ଅତ୍ୟନ୍ତ ନିମ୍ନମାନର ହେଉଥିବା ଅଭିଯୋଗ ହୋଇଆସୁଛି । କେନ୍ଦୁଝର ଯୋଡା ବ୍ଲକ, ବିରିକଳା ପଞ୍ଚାୟତର ବିଲେଇପଦା ଉଚ୍ଚ ବିଦ୍ୟାଳୟକୁ ୨୦୨୨-୨୩ ଆର୍ଥିକ ବର୍ଷରେ ୫ଟି ପର୍ଯ୍ୟାୟରେ ରୂପାନ୍ତରିତ କରାଯାଇଥିଲା। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ୨୦୨୨ ଜୁନ ୪ ତାରିଖରେ ଭରଚୁଆଲ ମୋଡରେ ଏହାକୁ ଲୋକାର୍ପିତ କରିଥିଲେ । କିନ୍ତୁ ନିମ୍ନମାନର କାର୍ଯ୍ୟ ଯୋଗୁଁ ମାତ୍ର ଦେଢବର୍ଷ ନପୂରୁଣୁ ବିଦ୍ୟାଳୟ ପରିସରରେ ବିଛାଯାଇଥିବା ପେଭର ବ୍ଲକ ଦବିଯିବା ସହ ବିଦ୍ୟାଳୟରେ ଲାଗିଥିବା ରଙ୍ଗ ଉଡିଗଲାଣି । ବିଦ୍ୟାଳୟ କୋଠାର ସାମ୍ନାପଟେ ରଙ୍ଗ ବୋଳି ପଛପଟକୁ ସେମିତି ଛାଡିଦେଇଛନ୍ତି। ଶ୍ରେଣୀ ଗୃହର ଆଜବେଷ୍ଟ ସବୁ ଉଠିଗଲାଣି । ନୂତନ ଶ୍ରେଣୀ ଗୃହ ଆଦୌ ତିଆରି ହୋଇନଥିବା ବେଳେ ପାଚେରୀ ନିର୍ମାଣ ମଧ୍ୟ ପୂର୍ବବତ୍ ଅସମ୍ପୂର୍ଣ୍ଣ ରହିଛି । ଫଳରେ ପାଚେରୀ ଡେଇଁ ରାତି ଅଧିଆ ଆସାମାଜିକ ବ୍ୟକ୍ତି ବିଦ୍ୟାଳୟ ହତା ଭିତରେ ପ୍ରବେଶ କରି ବିଭିନ୍ନ ଅସାମାଜିକ କାର୍ଯ୍ୟ କଳାପ କରୁଥିବା ଅଭିଯୋଗ ହେଉଛି ।
ଛାତ୍ରଛାତ୍ରୀଙ୍କ ପାଇଁ ବିଦ୍ୟାଳୟରେ ମୌଳିକ ସୁବିଧା ନାହିଁ । ଅନ୍ୟ ପକ୍ଷରେ ଏହି ବିଦ୍ୟାଳୟଟି ବ୍ଲକ ଗ୍ରାଣ୍ଟ ମାଧ୍ୟମରେ ୧୯୯୮ ରୁ ଦୀର୍ଘ ୩୪ ବର୍ଷ ଧରି ପରିଚାଳିତ ହୋଇଆସୁଅଛି । ବିଦ୍ୟାଳୟଟିରେ ଏବେ ୧୮୮ଜଣ ଛାତ୍ର, ଛାତ୍ରୀ କେବଳ ୯ମ ଓ ୧୦ମ ଶ୍ରେଣୀରେ ଅଧ୍ୟୟନ କରୁଥିବା ବେଳେ, ୧୨ଜଣ ଶିକ୍ଷକଙ୍କ ସ୍ଥାନରେ ମାତ୍ର ୪ଜଣ ଶିକ୍ଷକ ବିଦ୍ୟାଳୟରେ ପାଠ ପଢ଼ାଉଛନ୍ତି । ଶିକ୍ଷକ ଅବସର ଅବା ବଦଳି ହେଲେ ତାଙ୍କ ସ୍ଥାନରେ ନୂତନ ଶିକ୍ଷକ ନିଯୁକ୍ତି ଦିଆଯାଉନାହିଁ । ବିଦ୍ୟାଳୟରେ ପ୍ରଧାନଶିକ୍ଷକଙ୍କ ଅବସର ପରେ ତାଙ୍କ ପଦବୀଟି ବର୍ଷ ବର୍ଷ ଧରି ମଧ୍ୟ ପୂରଣ ହୋଇପାରିନାହିଁ । ଗଣିତ, ବିଜ୍ଞାନ, ଇଂରାଜୀ, ସାହିତ୍ୟ ଭଳି ଗୁରୁତ୍ୱପୂର୍ଣ୍ଣ ବିଷୟ ଗୁଡିକରେ ଶିକ୍ଷକ ନାହାନ୍ତି । ବିଦ୍ୟାଳୟରେ କମ୍ପ୍ୟୁଟର ରହିଛି କିନ୍ତୁ ଶିକ୍ଷକ ନଥିବାରୁ ପିଲାଙ୍କ କାମରେ ନଆସି ସେଗୁଡିକ ଖତଖାଉଛି ।