ଷ୍ଟାଡିୟମ ଉଦଘାଟନର ବର୍ଷ ଦୁଇଟା ନ ପୁରୁଣୁ ଛାତ ଫାଟି ଆଁ କଲାଣି। ନିମ୍ନମାନର କାମ ପାଇଁ ସ୍ୱଳ୍ପ ସମୟରେ ସୃଷ୍ଟି ହୋଇଥିବା ଫାଟକୁ ଲୁଚାଇବାକୁ ଚାଲିଛି ପ୍ରୟାସ। ଖଲ୍ଲିକୋଟବହୁମୂଖୀ ଇଣ୍ଡୋର ଷ୍ଟାଡିୟମରେ ଦେଖିବାକୁ ଏମିତି ଉଚ୍ଚକୋଟିର କାମ।
ଯୁବ ବର୍ଗଙ୍କୁ କ୍ରୀଡା ପ୍ରତି ଆକୃଷ୍ଟ କରିବା ସହ କ୍ରୀଡାବିତଙ୍କୁ ପ୍ରଶିକ୍ଷଣ ଯୋଗାଇ ଦେବାକୁ ରାଜ୍ୟ ସରକାର ବିଭିନ୍ନ ଜିଲ୍ଲାରେ ନିର୍ମାଣ କରିଛନ୍ତି ଷ୍ଟାଡିଏମ। ଏହି କ୍ରମରେ ନିର୍ମାଣ ହୋଇଥିଲା ଖଲ୍ଲିକୋଟ ବହୁମୂଖୀ ଇଣ୍ଡୋର ଷ୍ଟାଡିୟମ୍। କିନ୍ତୁ ଷ୍ଟାଡିୟମ ଉଦଘାଟନକୁ ଦୁଇ ବର୍ଷ ନ ପୂରୁଣୁ, ନିର୍ମାଣରେ ତ୍ରୁଟି ବିଚ୍ୟୁତି ଓ ନିମ୍ନମାନର କାମ ଯୋଗୁଁ ଷ୍ଟାଡିୟମର ମୁଖ୍ୟ ଛାତର ବିଭିନ୍ନ ସ୍ଥାନରେ ବଡ଼ ବଡ଼ ଫାଟ ସୃଷ୍ଟି ହୋଇଛି। ଏବେ ତ୍ରୁଟି ଲୁଚାଇବାକୁ ଠିକାଦାର ଓ ଯନ୍ତ୍ରୀ ମିଶି ଛାତର ଫାଟ ସ୍ଥାନରେ ସିମେଣ୍ଟ ସହ କିଛି ରାସାୟନିକ ଦ୍ରବ୍ୟର ଲେପ ଦେଇ କାମଚଳା ପଦକ୍ଷେପ ନେଉଥିବା ଦେଖିବାକୁ ମିଳିଛି। କାନ୍ଥ ଓ ପାଚେରୀର ବିଭିନ୍ନ ସ୍ଥାନରେ ଥିବା ଫାଟରେ ଚୂନ ଓ ରଙ୍ଗ ବୋଳି ମୋଟା ଅଙ୍କର ବିଲ୍ ହାତେଇ ବା ପାଇଁ ମସୁଧା ଚାଲିଛି । ଏତାଦୃଶ କାର୍ଯ୍ୟକୁ ନେଇ ଏବେ ଷ୍ଟାଡିୟମର ସ୍ଥାୟୀତ୍ବ ଉପରେ ସାଧାରଣରେ ସନ୍ଦେହ ପ୍ରକାଶ ପାଇଲାଣି।