ୟୁକ୍ରେନ୍ ରାଷ୍ଟ୍ରପତି ଭୋଲୋଡିମିର ଜେଲେନସ୍କି ଜଣାଇଛନ୍ତି ଯେ, ଆମେରିକା ରୁଷ–ୟୁକ୍ରେନ ଯୁଦ୍ଧ ଶେଷ କରିବା ପାଇଁ ଜୁନ୍ ମାସକୁ ନୂତନ ଡେଡ୍ଲାଇନ୍ ଭାବେ ନିର୍ଦ୍ଧାରଣ କରିଛି। ସେଙ୍କଥାମତେ, ୱାଶିଙ୍ଗଟନ୍ ଚାହୁଁଛି ଯେ ଗ୍ରୀଷ୍ମ ଋତୁ ଆରମ୍ଭ ହେବାରୁ ପୂର୍ବରୁ ଦୁଇ ଦେଶର ମଧ୍ୟରେ ସାମରିକ ସଂଘର୍ଷର ଅବସାନ ଘଟୁ। ଜେଲେନସ୍କି କହିଛନ୍ତି ଯେ, ଆସନ୍ତା ସପ୍ତାହରେ ରୁଷିଆ ଏବଂ ୟୁକ୍ରେନକୁ ଆଉ ଏକ ଆଲୋଚନା ଚକ୍ର ପାଇଁ ଡାକାଯିବ। ସେ ଆହୁରି ସୂଚନା ଦେଇଛନ୍ତି ଯେ, ଡୋନାଲ୍ଡ ଟ୍ରମ୍ପଙ୍କ ପ୍ରଶାସନ ଜୁନ୍ ମଧ୍ୟରେ ଏକ ଶାନ୍ତି ସମ୍ମତିକୁ କାଗଜରେ ଆଣିବା ପାଇଁ ଉଭୟ ପକ୍ଷଙ୍କ ଉପରେ ପ୍ରବଳ ଚାପ ଦେବାକୁ ପ୍ରସ୍ତୁତ।ଆମେରିକା ଚାହୁଁଛି ଯେ ଶାନ୍ତି ପ୍ରକ୍ରିୟା ସୁସ୍ପଷ୍ଟ ଭାବରେ ଆଗକୁ ବଢ଼ୁ ଏବଂ ନିର୍ଦ୍ଧାରିତ ସମୟସୀମା — ଅର୍ଥାତ୍ ଜୁନ୍ — ପୂର୍ବରୁ ଏକ ଅନ୍ତିମ ଚୁକ୍ତି ହୋଇଯାଉ। ଜେଲେନସ୍କି ସତର୍କ କରିଛନ୍ତି ଯେ ଯଦି ଏହି ସମୟସୀମାରେ ଚୁକ୍ତି ନ ହୋଇପାରେ, ତେବେ ଆମେରିକା ରୁଷ ଓ ୟୁକ୍ରେନ ଉଭୟଙ୍କୁ ଆହୁରି ଦୃଢ଼ ଚାପରେ ରଖିପାରେ।
ଟ୍ରମ୍ପଙ୍କୁ ପ୍ରତିଶ୍ରୁତି ମନେ ପକାଇ ଦେଲେ ଜେଲେନସ୍କି
ଜେଲେନସ୍କି ମନେ ପକାଇ ଦେଇଛନ୍ତି, ରାଷ୍ଟ୍ରପତି ହେବା ପୂର୍ବରୁ ଡୋନାଲ୍ଡ ଟ୍ରମ୍ପ କହିଥିଲେ, ସେ ୨୪ଘଣ୍ଟା ମଧ୍ୟରେ ଯୁଦ୍ଧ ସମାପ୍ତ କରିବେ। ପରେ ୟୁକ୍ରେନ ପାଇଁ ତାଙ୍କର ସ୍ୱତନ୍ତ୍ର ଦୂତ କିଥ୍ କେଲୋଗ୍ କହିଥିଲେ, ଟ୍ରମ୍ପଙ୍କ ଶପଥ ଗ୍ରହଣର ୧୦୦ ଦିନ ମଧ୍ୟରେ ଏକ ଚୁକ୍ତି ହୋଇପାରେ। ମାତ୍ର ଏହି ଲକ୍ଷ୍ୟ ପୂରଣ ହୋଇପାରି ନାହିଁ । ପରବର୍ତ୍ତୀ ସମୟରେ ଆମେରିକା ଗତ ବର୍ଷ ଅଗଷ୍ଟରେ ଏକ ନୂତନ ସମୟସୀମା ସ୍ଥିର କରିଥିଲା, କିନ୍ତୁ ତାହା ମଧ୍ୟ କୌଣସି ଫଳାଫଳ ବିନା ଶେଷ ହୋଇଯାଇଥିଲା । ଡିସେମ୍ବରରେ, ଟ୍ରମ୍ପ ଦାବି କରିଥିଲେ, ଏକ ଶାନ୍ତି ଚୁକ୍ତିନାମା ପ୍ରାୟ ୯୫% ପ୍ରସ୍ତୁତ, ତଥାପି ଯୁଦ୍ଧ ଜାରି ରହିଛି ।
ଆବୁଧାବି ବୈଠକ ବିଫଳ
ଚଳିତ ସପ୍ତାହରେ, ଆବୁଧାବିରେ ଆମେରିକା ନେତୃତ୍ୱରେ ଦୁଇ ଦିନିଆ ଶାନ୍ତି ଆଲୋଚନା ଅନୁଷ୍ଠିତ ହୋଇଥିଲା। ଏହି ବୈଠକ କୌଣସି ବଡ଼ ଫଳାଫଳ ଦେଇ ନଥିଲେ ମଧ୍ୟ, ୟୁକ୍ରେନର ରାଷ୍ଟ୍ରପତି କାର୍ଯ୍ୟାଳୟର ମୁଖ୍ୟ କିରିଲୋ ବୁଡାନୋଭ କହିଥିଲେ, ତ୍ରିପାକ୍ଷିକ ଆଲୋଚନା ସକାରାତ୍ମକ ଥିଲା। ଜେଲେନସ୍କି କହିଛନ୍ତି. ଟ୍ରମ୍ପ ପ୍ରଶାସନ ଏବେ ଆମେରିକାରେ ପରବର୍ତ୍ତୀ ଶାନ୍ତି ଆଲୋଚନା କରିବାକୁ ପ୍ରସ୍ତାବ ଦେଉଛି। ଏହି ବୈଠକ ଆସନ୍ତା ସପ୍ତାହରେ ମିଆମିରେ ହୋଇପାରେ। ସେ ଏଥିରେ ଯୋଗଦେବା ପାଇଁ ଆମେରିକା ଯିବେ। ଜେଲେନସ୍କି ଏହା ମଧ୍ୟ ସଙ୍କେତ ଦେଇଛନ୍ତି ଯେ, ଜୁନ୍ ମାସର ସମୟସୀମା ଟ୍ରମ୍ପଙ୍କ ମଧ୍ୟବର୍ତ୍ତୀକାଳୀନ ନିର୍ବାଚନ ଅଭିଯାନ ସହିତ ଜଡିତ ହୋଇପାରେ। ସେ କହିଛନ୍ତି, ମଧ୍ୟବର୍ତ୍ତୀକାଳୀନ ନିର୍ବାଚନ ଆମେରିକା ପାଇଁ ବହୁତ ଗୁରୁତ୍ୱପୂର୍ଣ୍ଣ। ଯଦି ରୁଷ ପ୍ରକୃତରେ ଯୁଦ୍ଧ ସମାପ୍ତ କରିବାକୁ ଚାହୁଁଛି, ତେବେ ଏକ ନିର୍ଦ୍ଦିଷ୍ଟ ସମୟସୀମା ଜରୁରୀ ବୋଲି ସେ କହିଛନ୍ତି ।