ଶୁଣିଲେ ତ…. ପାଚିକା ଅଛନ୍ତି ଲୋୟର ପିଏମଜିରେ ଆଉ ଏଠି ଶିକ୍ଷକ ପିଲାମାନଙ୍କ ପାଇଁ କରୁଛନ୍ତି ରୋଷେଇ । ସାର୍ ଚେକା ପକାଇ ପରିବା କାଟୁଛନ୍ତି ଆଉ ଦିଦି ସେପଟେ ରାନ୍ଧିବାରେ ବ୍ୟସ୍ତ । କରିବେ କଣ ପିଲାଙ୍କ ମଧ୍ୟାହ୍ନ ଭୋଜନ ପାଇଁ ଥିବା ପାଚକା ଗତ କିଛି ଦିନ ଧରି ନିଜ ନିଜର ଦାବି ନେଇ ଭୁବନେଶ୍ବର ଲୋୟର ପିଏମଜିରେ ପ୍ରତିବାଦ କରୁଛନ୍ତି । ସାର, ଦିଦିଙ୍କୁ ପିଲାଙ୍କ ପାଠ ପଢା ଠାରୁ ଅଧିକ ଚିନ୍ତା ଘାରିଛି ମଧ୍ୟାହ୍ନ ଭୋଜନକୁ ନେଇ । କାରଣ ଅନେକ ଗରିବ ଶ୍ରେଣୀର ପିଲା ବିଦ୍ୟାଳୟ ଆସୁଛନ୍ତି । ଯଦି ସେମାନଙ୍କୁ ମଧ୍ୟାହ୍ନ ଭୋଜନ ଦିଆନଯାଏ ତାହେଲେ ସେମାନେ ବିଦ୍ୟାଳୟରୁ ମୁହଁ ଫେରାଇ ନେବେ । ସ୍କୁଲରେ ପିଲା ସଂଖ୍ୟା କମିଯିବ ।
ଏମିତି ଏକ ଚିତ୍ର ଦେଖିବାକୁ ମିଳିଛି କେନ୍ଦୁଝର ଜିଲ୍ଲା ହାଟଡିହି ବ୍ଲକ ଛେନାପଦି ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟରେ। ବିଦ୍ୟାଳୟରେ ଆଜି ସାର ଚକଖଡ଼ି ଧରି କଳାପଟାରେ ଶିକ୍ଷାଦାନ କରିବା ପିବର୍ତ୍ତେ ହାତରେ ପନିକି ଏବଂ ଖଡିକା ଧରିବାକୁ ବାଧ୍ୟ ହୋଇଛନ୍ତି । ଯାହାଫଳରେ ପିଲାଙ୍କ ଶିକ୍ଷାଦାନରେ ବ୍ୟାଘାତ ସୃଷ୍ଟି କରୁଛି । ଏହି ବିଦ୍ୟାଳୟରେ ପ୍ରଥମରୁ ଅଷ୍ଟମ ପର୍ଯ୍ୟନ୍ତ ମୋଟ ୧୪୯ ଜଣ ଛାତ୍ରଛାତ୍ରୀ ଥିବା ବେଳେ ୪ ଜଣ ଶିକ୍ଷକ-ଶିକ୍ଷୟିତ୍ରୀ ନିଯୁକ୍ତି ଅଛନ୍ତି । କିନ୍ତୁ ଏବେ ୫ ଦିନ ହେଲା ପାଚିକା ସହାୟିକା ମାନେ ଆନ୍ଦୋଳନରେ ସାମିଲ ଥିବାରୁ ଶିକ୍ଷକ ଶିକ୍ଷୟିତ୍ରୀ ମାନେ ରୋଷେଇରେ ବ୍ୟସ୍ତ ରହୁଛନ୍ତି ।
ତେବେ ପାଚିକାଙ୍କ ଦାବି ସରକାର କେବେ ପୂରଣ କରୁଛନ୍ତି ଏବଂ ବିଦ୍ୟାଳୟର ଶିକ୍ଷକ ଶିକ୍ଷୟିତ୍ରୀ ମାନେ କେବେ ରୋଷେଇ ପରିବର୍ତ୍ତେ ପିଲାଙ୍କ ଉଜ୍ଜ୍ବଳମ. ଭବିଷ୍ୟତ ପାଇଁ ହାତରେ ଚକ ଖଡି ଧରୁଛନ୍ତି, ତାହା ସମୟ କହିବ ।