ସୁଧୁରୁଛି କେରଳର କୋଝିକୋଡ଼ରେ ନିପା ରୋଗୀ ଚିହ୍ନଟ। ନୂତନ ପରୀକ୍ଷା ହୋଇଥିବା ୪୯ଟି ନମୁନା ନେଗେଟିଭ ବାହାରିଥିବା ଜଣାପଡିଛି। ଅନ୍ୟ ୩୬ଟି ନମୁନା ପରୀକ୍ଷଣର ଫଳାଫଳ ଏପର୍ଯ୍ୟନ୍ତ ସାମ୍ନାକୁ ଆସିନାହିଁ। ଅନ୍ୟପକ୍ଷରେ ୩ ଜଣ ନିପା ରୋଗୀଙ୍କ ଅବସ୍ଥା ସ୍ଥିର ଥିବା ବେଳେ ନଅ ବର୍ଷର ଶିଶୁର ଅବସ୍ଥା ସୁଧୁରିଛି। ଏହି ଜୀବାଣୁ ଏପର୍ଯ୍ୟନ୍ତ ତାର ରୂପ ପରିବର୍ତ୍ତନ କରିନାହିଁ । କିନ୍ତୁ, ଏ ବାବଦରେ ଅଧିକ ଅଧ୍ୟୟନ ଆବଶ୍ୟକ ରହିଛି ବୋଲି କହିଛନ୍ତି ରାଜ୍ୟ ସ୍ୱାସ୍ଥ୍ୟମନ୍ତ୍ରୀ ବୀଣା ଜର୍ଜ ।
ଅନ୍ୟପଟେ ଗଣମାଧ୍ୟମକୁ ମୁଖ୍ୟମନ୍ତ୍ରୀ ପିନାରାଇ ବିଜୟ କହିଛନ୍ତି ଯେ କୋଝିକୋଡ଼ରେ ନିପା ଭାଇରସରୁ ସୃଷ୍ଟି ହୋଇଥିବା ସଙ୍କଟ ଏପର୍ଯ୍ୟନ୍ତ ଟଳି ନାହିଁ। ସ୍ୱାସ୍ଥ୍ୟ ଅଧିକାରୀମାନେ କହିଛନ୍ତି, ଭାଇରାଲ ସଂକ୍ରମଣ ଏହାର ପ୍ରାରମ୍ଭିକ ପର୍ଯ୍ୟାୟରେ ଅଛି ଏବଂ ଏହାକୁ ରୋକିବା ପାଇଁ ପଦକ୍ଷେପ ନିଆଯାଉଛି।
କେରଳ ସ୍ୱାସ୍ଥ୍ୟମନ୍ତ୍ରୀ ବୀଣା ଜର୍ଜଙ୍କ କହିବା ଅନୁସାରେ, ସେପ୍ଟେମ୍ବର ୧୫ ପରେ ଲ୍ୟାବ ପରୀକ୍ଷା ପାଇଁ ପଠାଯାଇଥିବା ୭୧ ଟି ନମୁନା ଏହି ଜୀବାଣୁ ପାଇଁ ନକାରାତ୍ମକ ଆସିଛି । କେରଳର କୋଝିକୋଡ଼ ଜିଲ୍ଲାର ନିପା ସଂକ୍ରମିତ ରୋଗୀଙ୍କ ଯୋଗାଯୋଗ ତାଲିକାରେ ଥିବା ଲୋକଙ୍କୁ ଅତି କମରେ ୨୧ ଦିନ ପାଇଁ ଅଲଗା ରଖିବାକୁ କୁହାଯାଇଛି । ସୋମବାର ଦିନ କୋଝିକୋଡ଼, ମାଲାପୁରାମ, କନ୍ନୁର, ୱାୟନାଡ, ଥ୍ରୀସୁର ଏବଂ ପାଲକ୍କଡ ଜିଲ୍ଲାର ଜିଲ୍ଲା ଚିକିତ୍ସା ଅଧିକାରୀଙ୍କ ବୈଠକ ପରେ ସ୍ୱାସ୍ଥ୍ୟମନ୍ତ୍ରୀ ବୀଣା ଜର୍ଜ ଏହା କହିଛନ୍ତି ।
ସଂକ୍ରମିତ ବ୍ୟକ୍ତିଙ୍କ ସହ ସମ୍ପର୍କ ଥିବା ଜଣାପଡିବା ପରେ କୋଜିକୋଡେ ବ୍ୟତୀତ ଅନ୍ୟାନ୍ୟ ଜିଲ୍ଲାରେ ୪୫ ଜଣ କ୍ୱାରେଣ୍ଟିନରେ ଅଛନ୍ତି। ଏହି ସ୍ଥାନଗୁଡିକରେ ଆଇସୋଲେସନ୍ ୱାର୍ଡ ଏବଂ ସ୍ୱତନ୍ତ୍ର ଆମ୍ବୁଲାନ୍ସ ପ୍ରସ୍ତୁତ କରାଯାଇଛି | ବର୍ତ୍ତମାନ ପରିସ୍ଥିତି ନିୟନ୍ତ୍ରଣରେ ଥିବା ସୂଚନା ମିଳିଛି ।