ରାଜ୍ୟରେ ଗୋଟେ ପରେ ଗୋଟେ ଥାର୍ ଦୁର୍ଘଟଣାର ଚିନ୍ତା ବଢ଼ିଲାଣି | ଗତକାଲି ଖୋର୍ଦ୍ଧା ଜିଲ୍ଲା ଗଙ୍ଗପଡ଼ା ନିକଟରେ ଘଟିଥିବା ଏକ ଭୟଙ୍କର ସଡ଼କ ଦୁର୍ଘଟଣାରେ ୩ ଜଣଙ୍କର ମୃତ୍ୟୁ ହୋଇଛି | ଦ୍ରୁତ ଗତିରେ ଆସୁଥିବା ଏକ ଥାର୍ ଗାଡ଼ିଟି ରାସ୍ତା କଡ଼ରେ ଛିଡ଼ା ହୋଇଥିବା ଏକ ଟ୍ରେଲରକୁ ପଛ ପଟୁ ଧକ୍କା ଦେଇଥିଲା| ଧକ୍କା ଏତେ ଜୋରସେ ଥିଲା ଯେ ଥାର୍ ଗାଡ଼ିଟି ସମ୍ପୂର୍ଣ୍ଣ ଚୁରମାର ହୋଇଯାଇଥିଲା |
ଦୁର୍ଘଟଣା ସମୟରେ ଥାର୍ ଗାଡ଼ିରେ ୪ ଜଣ ଯାତ୍ରୀ ବସିଥିଲେ | ସେହିଠି ତିନି ଜଣଙ୍କର ଘଟଣାସ୍ଥଳରେ ମୃତ୍ୟୁ ହୋଇଥିବାବେଳେ ଗୁରୁତର ଭାବେ ଆହତ ହୋଇଥିବା ଲୋକଟିକୁ ଭୁବନେଶ୍ବର ଏମ୍ସରେ ଭର୍ତ୍ତି କରାଯାଇଛି| ମୃତାହତମାନେ ଜଟଣୀ ବ୍ଲକ ମଦନପୁର ଅଞ୍ଚଳର ବୋଲି ଜଣାପଡିଛି | ଚର୍ଚ୍ଚାର ବିଷୟ ହେଉଛି କି ଏହି ଥାର୍ ଗାଡ଼ିଟି ମାତ୍ର ୧୫ ଦିନ ତଳେ କିଣାଯାଇଥିଲା |
ଏହା ପୂର୍ବରୁ ମଧ୍ୟ ଭୁବନେଶ୍ବର କ୍ୟାପିଟାଲ ହସ୍ପିଟାଲ ସାମ୍ନାରେ ଗତ ମଙ୍ଗଳବାର ରାତିରେ ଏକ ଥାର୍ ଗାଡ଼ି ବୁଲେଟକୁ ଧକ୍କା ଦେଇଥିଲା | ସେଠାରେ ଜଣେ ଯୁବକଙ୍କ ମୃତ୍ୟୁ ହୋଥିବାବେଳେ ୨ଜଣଙ୍କ ଅବସ୍ଥା ବହୁତ ଗୁରୁତ୍ୱର ହୋଇଥିଲା | ଏହା ପୂର୍ବରୁ ଚନ୍ଦକା ରୋଡ୍ ଓ ପାତ୍ରପଡ଼ା ଅଞ୍ଚଳରେ ମଧ୍ୟ ଥାର୍ ଦୁର୍ଘଟଣା ଘଟିଥିବା ନଜର ଆସିଛି |
କଡ଼ା ଟ୍ରାଫିକ୍ ନିୟମ, ଓଭରସ୍ପିଡ୍ ବିରୋଧରେ କଡା କାର୍ଯ୍ୟାନୁଷ୍ଠାନ ଓ ଯୁବପିଢ଼ିଙ୍କ ମଧ୍ୟରେ ରାସ୍ତା ସୁରକ୍ଷା ସଚେତନତା ନ କରିଲେ , “କିଲର୍ ଗାଡ଼ି” ଭାବେ ପରିଚିତ ହେଉଥିବା ଥର ଗାଡି ଦ୍ୱାରା ଦୁର୍ଘଟଣାକୁ ରୁକିବା କଷ୍ଟକର ହୋଇଯିବ |