କ୍ରିକେଟ ବିଶ୍ୱକପରେ ଆଜି ଭାରତ-ପାକିସ୍ତାନ ମଧ୍ୟରେ ହେବ ହାଇଭୋଲଟେଜ ଟକ୍କର। ଅହମଦାବାଦର ନରେନ୍ଦ୍ର ମୋଦି ଷ୍ଟାଡିୟମରେ ସାମ୍ନାସାମ୍ନି ହେବେ ଦୁଇ ପାରମ୍ପରିକ ପ୍ରତିଦ୍ୱନ୍ଦୀ। ୱାନ୍ ଡେ ବିଶ୍ୱକପର ସବୁ ମ୍ୟାଚରେ ପାକିସ୍ତାନକୁ ହରାଇଛି ଭାରତ। ରେକର୍ଡ ଏବେ ରହିଛି ୭-୦ । ସେହି ରେକର୍ଡକୁ ଅକ୍ଷୁଣ୍ଣ ରଖିବାକୁ ଟାର୍ଗେଟ କରିଛି ଭାରତ। ସେପଟେ ପାକିସ୍ତାନର ବାବର ଆଜମ ଆଣ୍ଡ କୋ ଏହି କଳଙ୍କକୁ ଲିଭାଇବାକୁ ଚେଷ୍ଟା କରିବେ। ତେଣୁ ଆଜିର ମ୍ୟାଚ ରୋମାଞ୍ଚକର ହେବ ବୋଲି ଆଶା କରାଯାଉଛି।
ଭାରତର ବ୍ୟାଟିଂ ଓ ପାକିସ୍ତାନର ବୋଲିଂ ମଧ୍ୟରେ ହେବ କଡ଼ା ମୁକାବିଲା। ଉଭୟ ଟିମରେ ରହିଛନ୍ତି ଗେମ୍ ଚେଞ୍ଜର୍ ଓ ଅଭିଜ୍ଞ ଖେଳାଳି। ଏକ ରୋମାଞ୍ଚକର ମୁକାବିଲା ଅପେକ୍ଷାରେ ସାରା ବିଶ୍ୱର କ୍ରିକେଟ ଫ୍ୟାନ। ପାକିସ୍ତାନ ଟିମ୍ରେ ସାହିନ ଶାହ ଆଫ୍ରିଦ, ହାରିଶ ରୌଫ ଏବଂ ହାସନ ଅଲ୍ଲୀଙ୍କ ଭଳି ବୋଲର ଥିବା ବେଳେ ଭାରତ ପାଖରେ ରୋହିତ, ବିରାଟ କୋହଲି, ରାହୁଲଙ୍କ ଭଳି ଧୁଆଁଦାର ବ୍ୟାଟ୍ସମ୍ୟାନ ବି ଅଛନ୍ତି।
ଏହି ମ୍ୟାଚ୍ର ବିଜ୍ଞାପନ ଦର ଆକାଶଛୁଆଁ ସ୍ତରରେ ପହଞ୍ଚିଛି। ୧୦ ସେକେଣ୍ଡ ବିଜ୍ଞାପନର ଦାମ୍ ୬୦ ଲକ୍ଷ ଟଙ୍କା ଭଳି ଉଚ୍ଚ ସ୍ତରରେ ପହଞ୍ଚିଛି। ୨୦୧୯ କ୍ରିକେଟ୍ ବିଶ୍ବକପ ମ୍ୟାଚ୍ ତୁଳନାରେ ଆସନ୍ତାକାଲିର ଭାରତ-ପାକ୍ ମ୍ୟାଚ୍ରେ ବିଜ୍ଞାପନ ଦାମ୍ ୪୦ ପ୍ରତିଶତ ବୃଦ୍ଧି ପାଇଥିବା ଡେଲଏଟ୍ର ପାର୍ଟନର ଜେହିଲ୍ ଠକର୍ କହିଛନ୍ତି। ଯେଉଁ ବିଜ୍ଞାପନଦାତାମାନେ ବିଶ୍ବକପ୍ର ସବୁ ମ୍ୟାଚ୍ ପାଇଁ ବିଜ୍ଞାପନ ବୁକିଂ କରିଛନ୍ତି ସେମାନେ ୧୦ ସେକେଣ୍ଡର ବିଜ୍ଞାପନ ଲାଗି ୩୫-୪୫ ଲକ୍ଷ ଟଙ୍କା ଦେବେ। ଚଳିତ ବର୍ଷ କ୍ରିକେଟ୍ ବିଶ୍ବକପ୍ରେ ୨୫୦୦-୩୦୦୦ କୋଟି ଟଙ୍କାର ବିଜ୍ଞାପନ ଆୟ ହେବ ବୋଲି ଆକଳନ କରାଯାଇଛି। ୨୦୧୯ ବିଶ୍ବକପ୍ରେ ବିଜ୍ଞାପନରୁ ୧୩୫୦ କୋଟି ଟଙ୍କା ଆୟ ହୋଇଥିଲା।
ଏସିଆ କପରେ ପାକିସ୍ତାନକୁ ଭାରତୀୟ ଟିମ ପରାଜିତ କରିଥିବାରୁ ଖେଳାଳିଙ୍କ ମନୋବଳ ସୁଦୃଢ ରହିଛି। ଚଳିତ ବିଶ୍ୱକପରେ ଭାରତୀୟ ଟିମ୍ ନମ୍ବର ୱାନ୍ ଟିମ୍ ହୋଇଥିବା ବେଳେ ପ୍ରଦର୍ଶନ ମଧ୍ୟ ଦମଦାର ରହିଛି । କପ୍ତାନ ହିଟମ୍ୟାନ ବି ଫର୍ମରେ ଅଛନ୍ତି । ଭାରତର ବୋଲିଂ ସାଇଡ ବି ଖୁବ୍ ଷ୍ଟ୍ରଙ୍ଗ ଅଛି। ବୁମ ବୁମ ବୁମରା ମାପିଚୁପି ବୋଲିଂ କରୁଛନ୍ତି, ସିରାଜ, ଚାଇନମ୍ୟାନ କୁଲଦୀପ ଯାଦବ ବି ଜବରଦସ୍ତ ଫର୍ମରେ ଅଛନ୍ତି ।