ଗୋଟିଏ ନାହିଁ କି ୨ଟି ନୁହଁ, ମାସକ ମଧ୍ୟରେ ଚାଲିଗଲାଣି ୧୦ରୁ ଉର୍ଦ୍ଧ୍ବ ଜୀବନ । ଅଜଣା ରୋଗ ସାଜିଛି ଏମାନଙ୍କ ପାଇଁ କାଳ । ଏପରି ଘଟଣା ଦେଖିବାକୁ ମିଳିଛି କେନ୍ଦୁଝର ଜିଲ୍ଲା ବାଂଶପାଳ ବ୍ଲକ ଗୋନାସିକାର ଜନ୍ତାରୀ ଜୁଆଙ୍ଗ ବସ୍ତିରେ । କେନ୍ଦୁଝର ଜିଲ୍ଲା ବାଂଶପାଳ ବ୍ଲକ ଅନ୍ତର୍ଗତ ଗୋନାସିକାରେ ରହିଛି ଏହି ଜନ୍ତାରୀ ଗ୍ରାମ । ଗ୍ରାମରେ ବସବାସ କରୁଛନ୍ତି ପ୍ରାୟ ୧୦୦ରୁ ଉର୍ଦ୍ଧ୍ବ ଜୁଆଙ୍ଗ ପାରିବାର । ଵଣଜଙ୍ଗଲ ଉପରେ ନିର୍ଭର କରି ଏମାନେ ବେଶ ଆରାମରେ ଜୀବନ ବିତାଇଥାନ୍ତି । କିନ୍ତୁ, ଗତ ଏକ ମାସ ହେବ ଏମାନଙ୍କ ଉପରେ ଦାଉ ସାଧୁଛି ଅଜଣା ରୋଗ । ଏଥିରେ ଆକ୍ରାନ୍ତ ହୋଇ ମାସକ ମଧ୍ୟରେ ଗ୍ରାମରେ ୧୦ ଜଣ ମୃତ୍ୟୁ ବରଣ କଲେଣି ।
ଏପରିକି ଗୋଟିଏ ପରିବାରର ସ୍ୱାମୀ ସ୍ତ୍ରୀ ଏବଂ ଗୋଟିଏ ଛୁଆ କିଛି ଦିନ ବ୍ୟବଧାନରେ ମୃତ୍ୟୁବରଣ କରିଥିବା ବେଳେ ଏବେ ସେମାନଙ୍କ ଆଉ ୪ଟି କୋମଳମତି ନାବାଳିକା ଅନାଥ ହୋଇ ଗଣ୍ଡେ ଖାଇବାକୁ ଡହଳବିକଳ ହେଉଛନ୍ତି ।
ଏକ ମାସ ଭିତରେ ଗ୍ରାମର ସୁନିଆ ଜୁଆଙ୍ଗ ଓ ସ୍ତ୍ରୀ ରଶ୍ମି ଜୁଆଙ୍ଗ ଏବଂ ଏକ ମାସର ସାନ ଝିଅ ରିନୁର ମୃତ୍ୟୁ ପରେ ଏବେ ଆଉ ୪ ନାବାଳିକା ଖାଇବାକୁ ପାଉନାହାନ୍ତି । ଓଳିଏ ଖାଇଲେ ଆରଓଳି ଉପାସ ରହୁଛନ୍ତି । ସେମାନଙ୍କୁ ପାଖେ ଆଜି ସାହାରା କହିଲେ କେହି ନାହାନ୍ତି । ସେପଟେ ପ୍ରସାରଣ ପରେ ମେଡିକାଲ ସହ ପ୍ରଶାସନିକ ଟିମ୍ ଯାଇ ପହଞ୍ଚିଛି ଗାଁରେ ।