କପିଳେଶ୍ୱର ମନ୍ଦିର ରେ ଗତକାଲି ରାତିରୁ ସମସ୍ତ ନୀତିକାନ୍ତି ବନ୍ଦ ରହିଛି। ସେବାୟତମାନଙ୍କ ମଧ୍ୟରେ ବିବାଦ ସୃଷ୍ଟି ହେବାରୁ ଏହି ପରିସ୍ଥିତି ଉଦ୍ଭବ ହୋଇଛି।
ଖବର ଅନୁଯାୟୀ , ଗତକାଲି ଶ୍ରୀଲିଙ୍ଗରାଜ ମନ୍ଦିର ରେ ହାଣ୍ଡିଭଙ୍ଗା ଯାତ ହୋଇନଥିବାରୁ ଏହାର ପ୍ରଭାବ କପିଳେଶ୍ୱରଙ୍କ ନୀତିକାନ୍ତି ଉପରେ ପଡ଼ିଛି। ଫଳରେ ଗତ ରାତିରୁ ଠାକୁରଙ୍କ ସମସ୍ତ ପାରମ୍ପରିକ ନୀତି ବନ୍ଦ ରହିଛି।
ଆଜି ସକାଳୁ ମଙ୍ଗଳ ଆଳତି, ଅବକାଶ, ମଇଲମ ଓ ତଡ଼ପଲାଗି ପର୍ଯ୍ୟନ୍ତ କୌଣସି ନୀତି ପାଳନ ହୋଇନାହିଁ। ଖୁଣ୍ଟିଆ ସେବାୟତମାନେ ନୀତି କରିନଥିବା ବେଳେ ମଲିଆମାନେ ମଧ୍ୟ ଠାକୁରଙ୍କ ସେବାରେ ଅଂଶ ନେଇନାହାନ୍ତି। ଏହି ପରିସ୍ଥିତିରେ ଠାକୁର କପିଳେଶ୍ୱରଙ୍କ ନୀତିକାନ୍ତି ସମ୍ପୂର୍ଣ୍ଣ ରୂପେ ବନ୍ଦ ରହିଥିବାରୁ ଭକ୍ତମାନଙ୍କ ମଧ୍ୟରେ ଚିନ୍ତା ବ୍ୟକ୍ତ ହେଉଛି। ବିବାଦ ସମାଧାନ ପରେ ନୀତିକାନ୍ତି ପୁନର୍ବାର ଆରମ୍ଭ ହେବ ବୋଲି ଆଶା କରାଯାଉଛି।