ଶ୍ରୀମନ୍ଦିର ରତ୍ନଭଣ୍ଡାର ଅଳଙ୍କାର ଗଣତି ପ୍ରକ୍ରିୟା ଆଜି ଅଷ୍ଟମ ଦିନରେ ପ୍ରବେଶ କରିଛି। ଭିତର ଭଣ୍ଡାର ଗଣତିର ଏହା ହେଉଛି ତୃତୀୟ ଦିନ। ଗତକାଲିର ସଫଳ ଗଣତି ଏବଂ ରତ୍ନଭଣ୍ଡାର ଭିତରେ ଘଟୁଥିବା କିଛି ବିଶ୍ୱାସନୀୟ ଅଲୌକିକ ଘଟଣା ଏବେ ସବୁଠି ଚର୍ଚ୍ଚାର ବିଷୟ ପାଲଟିଛି। ଗତକାଲି ପ୍ରାୟ ୭ ଘଣ୍ଟା ଧରି ଅଳଙ୍କାର ଗଣତି ଓ ଯାଞ୍ଚ କାର୍ଯ୍ୟ କରାଯାଇଥିଲା। ସେଥିମଧ୍ୟରୁ ପ୍ରାୟ ୮୦ ପ୍ରକାର ଅଳଙ୍କାରର ଗଣତି ସମ୍ପୂର୍ଣ୍ଣ ହୋଇଛି। ସୂଚନାଯୋଗ୍ୟ ଯେ, ଭିତର ଭଣ୍ଡାରରେ ମୋଟ ୫୯୮ ପ୍ରକାର ଅଳଙ୍କାର ରହିଛି।
ଜଷ୍ଟିସ ରଥଙ୍କ ସୂଚନା ଅନୁଯାୟୀ, ୧୯୭୮ ମସିହାରେ ପ୍ରସ୍ତୁତ ହୋଇଥିବା ତାଲିକା ସହ ବର୍ତ୍ତମାନର ଅଳଙ୍କାର ଶତ ପ୍ରତିଶତ ମେଳ ଖାଉଛି। ଏହା ପ୍ରମାଣିତ କରୁଛି ଯେ ପୂର୍ବରୁ ହୋଇଥିବା ଗଣତି ଅତ୍ୟନ୍ତ ନିର୍ଭୁଲ ଥିଲା। ଗତ କିଛି ଦିନ ହେବ ରତ୍ନଭଣ୍ଡାର ଖୋଲିବା ଓ ଗଣତି ସମୟରେ କିଛି ଦେବୀ ସଂକେତ ଦେଖିବାକୁ ମିଳୁଛି: ଭିତର ଭଣ୍ଡାର ଖୋଲିବା କ୍ଷଣି ମା’ ସୁଭଦ୍ରାଙ୍କ ମାଳ ଛିଡ଼ିଥିଲା। ଗଣତି ଟିମ୍ ଭିତରକୁ ପ୍ରବେଶ କରିବା ସମୟରେ ପ୍ରଭୁ ବଳଭଦ୍ରଙ୍କ ମାଳ ଛିଡ଼ିଥିବା ଦେଖାଯାଇଥିଲା, ଯାହାକୁ ଅନେକ ଏକ ଶୁଭ ସଂକେତ ବୋଲି ମାନୁଛନ୍ତି। ଆଜି ପୂର୍ବାହ୍ନ ପ୍ରାୟ ୧୦:୩୫ ମିନିଟ୍ରେ ଗଣତି ଟିମ୍ ସିଂହଦ୍ୱାର ଦେଇ ଶ୍ରୀମନ୍ଦିର ପରିସରକୁ ପ୍ରବେଶ କରିଛନ୍ତି। ଆଜି ମଧ୍ୟ ଭିତର ଭଣ୍ଡାରର ବାକି ଥିବା ଅଳଙ୍କାରଗୁଡ଼ିକର ଗଣତି ଓ ତାଲିକାଭୁକ୍ତ କାର୍ଯ୍ୟ ଜାରି ରହିବ। ୧୯୭୮ର ଗଣତିକାରୀମାନେ ଅତି ନିଷ୍ଠାର ସହ କାର୍ଯ୍ୟ କରିଥିବାରୁ ଆମକୁ ବର୍ତ୍ତମାନ ମେଳକ କରିବାରେ ବହୁତ ସୁବିଧା ହେଉଛି। ସମସ୍ତ ପ୍ରକ୍ରିୟା ଅତି ସ୍ୱଚ୍ଛତାର ସହ ଚାଲିଛି।