ପାଟନା ମେଡିକାଲ କଲେଜରେ ଆଡମିଶନ ପାଇଁ ଏନଟିଏ ଦ୍ୱାରା ଆୟୋଜିତ ନିଟ୍ ୟୁଜି ପରୀକ୍ଷା ପ୍ରଶ୍ନ ପତ୍ର ଲିକ୍ ମାମଲାର ଯାଞ୍ଚ ଖୁବ୍ ଜୋର ସୋରରେ ଚାଲିଥିବାବେଳେ ପାଟନା ପୁଲିସ ଓ ଅର୍ଥନୈତିକ ଅପରାଧ ଶାଖାର ଛାନଭିନ୍ ରେ ନୂଆ ନୂଆ ଚେହେରା ସାମନାକୁ ଆସୁଛି। ପ୍ରଥମେ ସିକନ୍ଦର, ଅମିତ୍ , ଅନୁରାଗ ଅଂଶୁଳ ଓ ଅତୁଲଙ୍କ ପରେ ଏବେ ସଞ୍ଜୀବ ମୁଖିଆର ନାଁ ସାମନାକୁ ଆସିଛି। ଏହି ଘଟଣାର ସଂଜୀବ ମୁଖିଆଙ୍କୁ କିଙ୍ଗପିନ ବୋଲି କୁହାଯାଉଛି । ଅର୍ଥନୈତିକ ଅପରାଧ ଶାଖା ଓ ପାଟନା ପୁଲିସ ତାଙ୍କୁ ଗିରଫ କରିବା ପାଇଁ ବିଭିନ୍ନ ସ୍ଥାନରେ ଚଢାଉ ଜାରି ରଖିଛି ।
ମିଡ଼ିଆ ରିପୋର୍ଟ ମୁତାବକ, ସଞ୍ଜୀବ ମୁଖିଆକୁ ନିଟ୍ ପରୀକ୍ଷାର ପ୍ରଶ୍ନ ପତ୍ର ଜଣେ ପ୍ରଫେସର ମୋବାଇଲ ମାଧ୍ୟମରେ ପଠାଇଥିଲେ। ଏହାପରେ ସେ ପ୍ରତି ଛାତ୍ର ପିଛା ୪୦ ଲକ୍ଷ ଟଙ୍କାରେ ଡିଲ୍ କରିଥିଲା । ଏହାର ପୂରା ପ୍ଲାନିଂ ନିଜେ ସଞ୍ଜୀବ ହିଁ କରିଥିଲା। ସେ ସିକନ୍ଦର ଯଦୁବଂଶୀ ଓ ଅନ୍ୟମାନଙ୍କୁ ପେପର ଉପଲବ୍ଧ କରାଇ ଥିଲେ। ଏହାପରେ ୪ ମେ’ର ରାତି ଓ ୫ ମେ ରେ ନିଟ୍ର ପ୍ରାର୍ଥୀଙ୍କୁ ପ୍ରଶ୍ନ ପତ୍ରର ଉତ୍ତର ପାଟନାର ଖେମନି ଚକ ସ୍ଥିତ ପ୍ଲେ ଆଣ୍ଡି ଲର୍ନ ସ୍କୁଲର ହଷ୍ଟେଲରେ ଦିଆ ଯାଇଥିଲା। ସଞ୍ଜୀବ ମୁଖିଆର, ରବି ଅତ୍ରି ଗ୍ୟାଙ୍ଗ ସହ ସିଧାସଳଖ ସଂପର୍କ ରହିଛି।
ଉଲ୍ଲେଖନୀୟ ଯେ, ନିଟ୍ ପେପର ଲିକ୍ କାଣ୍ଡରେ ଫେରାର ଥିବା ସଞ୍ଜୀବ ମୁଖିଆଙ୍କ ଉପନାମ ଲୁଟନ ମୁଖିଆ ମଧ୍ୟ ରହିଛି। ସେ ନାଳନ୍ଦାର ନୁରସରାୟ ହର୍ଟିକଲଚର କଲେଜରେ ଟେକ୍ନିକାଲ ସହାୟକ ପଦରେ ମୁତୟନ ଥିଲା। ଚାକିରି ଛାଡ଼ି ସେ ରାଜନୀତରେ ପାଦ ରଖି ଥିଲା ଏବଂ ନିଜ ପଞ୍ଚାୟତର ମୁଖିଆ ହୋଇଥିଲା। ୨୦୧୬ରେ ପୁଲିସ୍ ଭର୍ତ୍ତି ପରୀକ୍ଷାରେ ପେପର ଲିକ୍ରେ ସର୍ବ ପ୍ରଥମେ ତାର ନାଁ ଆସିଥିଲା, ପରେ ବିଏସସି ଶିକ୍ଷକ ଭର୍ତ୍ତି ପରୀକ୍ଷାରେ ପେପର ଲିକ୍ କାଣ୍ଡରେ ତାର ସଂପୃକ୍ତି ରହିଛି। ସଞ୍ଜୀବ ମୁଖିଆ ବିଏସସି ଶିକ୍ଷକ ବହାଲି ପେପର ଲିକ୍ କାଣ୍ଡରେ ଜେଲ୍ ଯାଇ ସାରିିଛି ଏବଂ ତାର ପୁଅ ଡାକ୍ତର ଶିବ କୁମାର ଏହି ମାମଲାରେ ଏବେ ବି ଜେଲ୍ ରେ ଅଛି।