ଦୀର୍ଘ ୨୭ ବର୍ଷର ସଂଘର୍ଷ ପରେ…

ଦୀର୍ଘ ୨୭ ବର୍ଷର ନ୍ୟାୟିକ ଲଢେଇ ପରେ ବିଜୟ ହାସଲ କରିଛନ୍ତି ଶିକ୍ଷୟିତ୍ରୀ। ବିନା କାରଣରେ ଚାକିରିରୁ ତାଙ୍କୁ ବହିଷ୍କାର କରିବାକୁ ବିରୋଧ କରି ସେ ହୋଇଥିଲେ ହାଇକୋର୍ଟଙ୍କ ଦ୍ବାରସ୍ଥ। ଦୀର୍ଘ ଲଢେଇ ପରେ ସେ ବିଜୟୀ ହେବା ସହ ନିଜ ଚାକିରି ଫେରି ପାଇଛନ୍ତି, ଯାହାକୁ ନେଇ ସେ ବେଶ ଖୁସି। ସୂଚନା ମୁତାବକ, ଜି ଉଦୟଗିରି ବ୍ଲକ ଗ୍ରେଶିଙ୍ଗିଆ ପଞ୍ଚାୟତରେ ଥିବା ବନଶ୍ରୀ ବାଳିକା ଉଚ୍ଚ ବିଦ୍ୟାଳୟରେ ପି.ଇ.ଟି ଶିକ୍ଷୟିତ୍ରୀ ଭାବେ ୧୯୮୯ର ନର୍ମଦା କୁମାରୀ ପାତ୍ର ନିଯୁକ୍ତି ପାଇଥିଲେ। ନିଯୁକ୍ତିର କିଛି ବର୍ଷ ପରେ ହଠାତ୍ ତାଙ୍କୁ ଉକ୍ତ ଅନୁଷ୍ଠାନରୁ ବାହାର କରି ଦିଆଯାଇଥିଲା। ତେବେ ଏଥିରେ ସେ ଭାଙ୍ଗି ପଡି ନ ଥିଲେ। ବରଂ ନିଜ ନ୍ୟାଯ୍ୟ ଦାବି ପାଇଁ ଆଇନର ଆଶ୍ରୟ ନେଇଥିଲେ। ଦୀର୍ଘ ବର୍ଷ ଧରି ନ୍ୟାୟିକ ଲଢେଇ ଜାରି ରଖିବା ପରେ ଗତ ମାସରେ ତାଙ୍କୁ ନ୍ୟାୟାଳୟରୁ ମିଳିଥିଲା ବିଜୟ। ନ୍ୟାୟାଳୟ ତାଙ୍କ ଚାକିରି ଫେରାଇ ଦେବାକୁ ଅନୁଷ୍ଠାନକୁ ଦେଇଥିଲେ ନିର୍ଦ୍ଦେଶ। ଶେଷରେ ସେ ସେ ପୁଣି ପୁରୁଣା ଚାକିରି କ୍ଷେତ୍ର ବନଶ୍ରୀ ବାଳିକା ଉଚ୍ଚ ବିଦ୍ୟାଳୟକୁ ଯାଇ ଜଏନ କରିଛନ୍ତି। ଏଥିନେଇ ସେ ଧନ୍ୟବାଦ ଜଣାଇଛନ୍ତି କୋର୍ଟଙ୍କୁ।

ପୁରୁଣା ପରିଚୟ ପୁନର୍ବାର ଫେରି ପାଇଥିବାରୁ ସେ ବେଶ ଖୁସି। ତାଙ୍କ ଅବସରକୁ ଆଉ ମାତ୍ର ଦୁଇ ମାସ ଥିବା ବେଳେ ଏହି ସମୟ ସେ ଛାତ୍ରୀଙ୍କ କ୍ରୀଡା କ୍ଷେତ୍ରରେ ବିକାଶ ଦିଗରେ ଦେବେ ବୋଲି ଆଶା ପୋଷଣ କରୁଛନ୍ତି।